عيون الكلام

November 18, 2008


راجع من برة لسة من شوية .. خلاص آخر كام يوم في الأجازة :)
عندي احساس قوي بالإمتنان .. مش عارف حقيقي لإيه بالظبط .. بس مسيطر علي جدا ..
مستني الكاميرا اللي خلاص كلها اسبوعين و تشرف بفرحة قوية ..
قد ايه الحاجات البسيطة ممكن تسعدنا !
مرات ابن خالتي و احنا بنتعشى سئلتني لما عرفت اني هاجيب الكاميرا بالسعر ده “بس هاتصور بيها ايه ؟”
ضحكت و قلتلها “هصور مصر”
بادلتني الضحك و اكيد كانت بتقول في سرها “مجنون !”
:D
بس هي مش عارفة اني بتكلم بجد .. انا فعلا نفسي اصور البلد دي .. كل شبر فيها .. مش بس علشان انا مجنون بالتصوير .. انما كمان علشان البلد دي .. في كل شبر منها حدوتة ..
راجع من برة و اجزاء من على اسم مصر شغالة جوة دماغي .. لوحدها ..
طيب بجد بقى .. نفسي اصور مصر زي ماجاهين صورها في القصيدة دي !!!
اهه فكرة لسة جايالي .. انا مفروض اعمل مجموعات صور و اسميها من القصيدة دي اللي في رأيي من اجمل و اعمق و اصدق ما كتب عن مصر ..


النخل في العالى والنيل ماشى طوالى
معكوسه فيه الصوره .. مقلوبه وأنا مالى
ياولاد أنا ف حالى زى النقش ف العواميد
زى الهلال اللي فوق مدنا بنوها عبيد
وزى باقى العبيد بجرى على عيالى
بجرى وخطوى وئيد من تُقل أحمالى
محنيه قامتى .. وهامتى كأن فيها حديد
وعينيا رمل العريش فيها وملح رشيد
لكنى بافتحها زى إللى اتولدت جديد
على اسم مصر

ياولاد انا في حالي زي النقش في العواميد .. زي الهلال اللي فوق مدنا .. و زي العبيد !!


مصر..التلات احرف الساكنه إللى شاحنه ضجيج
زوم الهوا .. وطقش موج البحر لما يهيج
وعجيج حوافر خيول بتجر زغروط

في وسط زاحمتها .. على كوبري قصر النيل .. في قلب اسكندرية

مصر السما الفزدقى وعصافير معديه
والقله ممليه على الشباك .. منديه
والجد قاعد مربع يقرا ف الجرنال
الكاتب المصري ذاته مندمج فى مقال
ومصر قُدامه أكتر كلمه مقريه

في الصعيد في الغيطان الصبح بدري .. على قهوة في وسط البلد الضهر .. او في بحري عند المينا و اللي بنوا المراكب من ييجي ميت سنة و البحر ساب فوق جبينهم علامات !

مصر إللى عمر الجبرتى ما عرف لها عمر
وطلع لقاها مكان مليان عوام وزعر
جعيديه غوغاء يجيبوا تملى وجع الراس
وخليط أفارقه.. هنادوه.. روم.. ملل. ..أجناس
والترك فى القلعه .. والمماليك خدودهم حُمر

ايوة الترمسسس !
اوعى يمينك .. كرباج ورا ياسطى !
يا ابو خالو شوف بدك كام نفر و خبرنا ..
نفر امبااااااااااااابة
تحب حضرتك تقعد فين ؟؟ كل سنة و انت طيب !
الاسبوع الجاي في المحكى .. و آخر الشهر في الأوبرا .. حفلتين جاز !

عن الحب .. و اشياء اخرى

باحبها .. وهى مالكه الأرض شرق وغرب
وباحبها وهى مرميه جريحة حرب
بحبها برقه وبعنف وعلى إستحياء
وأكرهها وألعن أبوها .. بعشق زى الداء
واسيبها واطفش فى درب وتبقى هى فى درب
وتلتفت تلاقيني جنبها فى الكرب
والنبض ينفض عروقى بألف نغمه وضرب
على اسم مصر


Advertisements

One Response to “عيون الكلام”

  1. Anonymous Says:

    باحبها .. وهى مالكه الأرض شرق وغرب
    وباحبها وهى مرميه جريحة حرب
    بحبها برقه وبعنف وعلى إستحياء
    وأكرهها وألعن أبوها .. بعشق زى الداء
    واسيبها واطفش فى درب وتبقى هى فى درب
    وتلتفت تلاقيني جنبها فى الكرب
    والنبض ينفض عروقى بألف نغمه وضرب
    على اسم مصر
    كـــــــــــــــــــــده أكييييييد أنك برج السرطان
    اللى بيفرح بأأقل حاجه
    واللى يحب ينام راضى عن نفسه
    ونفسه بس مهما تعب بس ينول الجايزه
    ويحب السمع والقهاوى والكلمه الحلوه
    ومالوش بخت ونفسه بس يلاقى اللى يونسه
    والاخلاص والجدعنه مع الصحاب والاهل
    ويكتم أجدعها سر
    وفى كتيييير بس كفايه
    حلو الموضوع
    سلام


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: