شبورة ..

January 16, 2009

النهاردة بعد يوم طويل -مش قوي يعني- و شوية شغل صغيرين .. و بعد الغدا و الكلام و الفرجة على الاستاذ دودو و هو كل دقيقتين يضم ايديه على بعض و يزم شفايفه و يهز راسه قال ايه سيادته مخاصمنا و سايق فيها بقى !

روحت السينما ..  انا صحيح مختارتش الفلم و الحقيقة كنت قلقان منه مصاص دماء بقى و هيحب واحدة و ماليش انا اصلي في المواضيع دي و يخضني و اخضه و كلام فاضي ..

Twilight

ده اسم الفيلم .. و هو مأخوذ عن رواية ( سلسلة) بتحمل نفس الأسم و عاملة مبيعات عالية جدا .. انا مقريتش الرواية و ماكنتش اعرف الكلام ده غير لما اتقالي من الناس اللي كانوا معايا في السينما..

اللي عجبني قوي في الأفيش بتاع الفيلم التاج لاين بتاعه

When you can live forever .. what do you live for?

الفيلم ممكن يكون اسمه بيشير لفكرة ان المخلوقات دي -زي ماتوصفت في الفيلم- مابتظهرش في الشمس .. لأنها بيكون ليها انعكاس على جلدها بيظهر ساعتها الفرق بينها و بين البني آدمين و بالتالي الناس بتتعرف عليهم انهم مش “طبيعيين”

او قد يكون معناه – او على الأقل ده اللي انا حبيت اعتقده- انه بيتكلم عن حالة المجموعة دي من المخلوقات اللي ببتغذى على الدم .. و اختيارهم انهم مايتغذوش على دماء البشر .. فهما في الحالة دي مازالوا مش طبيعيين .. و لكنهم مش وحوش زي ماكانوا مفروض يكونوا ..

و هو ده اكثر ما عجبني في الفيلم ..

الفيلم من الناحية الفنية مش جامد .. و بالذات المؤثرات البصرية ..

لكن اختيار البطل و البطلة كان رائع و اظن ده اللي خلاني استمتع بالفيلم..

الفيلم بيتكلم عن الاختيار .. و ان مش كل الأشياء بالضرورة حتمية ..

يعني مش علشان فلان اتولد بشكل معين .. لازم يكون ناجح او فاشل .. طيب او شرير ..

و ان الخير مش حكر على حد اتولد بشكل معين او في ظروف معينة ..

انت اللي بتختار شكل حياتك .. و بالتالي بيكون عليك تحمل نتيجة اختيارك ..

دي كانت الفكرة اللي شدتني للفيلم ..

بعد ما الفيلم خلص .. قلت للي كانوا معايا .. كويس اني ماقرتش القصة لاني متأكد اني كنت هأصاب باحباط شديد – و ده اللي اتأكد منه بعد ماتكلمت مع حد قرأ القصة- .. لانه مع ان الفيلم في مجمله عجبني الا ان السيناريو كنص كان ضعيف جدا .. و كمان في جوانب كتير في الشخصيات لم يتم ايضاحها و ايضاح دوافع الشخصيات في الاختيارات دي – لضعف السيناريو بشكل كبير و طبعا ان الفيلم ساعتين و القصة 400 صفحة-  و انا جربت الموضوع في اكثر من فيلم كنت قريت القصة قبل ماشفهم – طبعا في افلام جائت جيدة مثل القصة-

بس طلعت من السينما الفيلم عاجبني و ده المهم ..

بعد السينما كنت خارج مع اهلي بعدين ماخرجوش .. نزلت انا اتمشيت شوية بالعربية .. كان فيه شبورة غريبة .. كأن النور اتقطع عن البلد .. مافيش نور باين من الشبابيك .. لدرجة اني في لحظة تخيلت فعلا ان الكهربا قطعت .. لولا نور الشارع جنبي كنت صدقت ده ..

بشكل غريب لدرجة خلتني انتبهت من حالة الغنا -اللاشعوري- اللي بتنتابني غالبا و انا في العربية لوحدي – و ساعات حتى مع ناس- يعلا صوت منير و هو بيقول “بعد الطوفان .. و الجو شبورة.. ننده لبعض .. بهمسة مذعورة .. بشويش نمد الإيدين .. ياللي انت جنبي .. انت فين ؟! .. كان فيه طوفان .. خلاص مبقاش طوفان .. المسني .. ونسني .. انا حيران !”

الشوارع في الضلمة كانت موحشة .. كأنها خلت من اي حياة .. حتى وسط البلد بكل دوشتها .. كانت فاضية و مضلمة ..

شوية لفيت و روحت بقى .. بفكر في السؤال اللي كان لسة بيتردد في مخي ..

لو تقدر تعيش للأبد .. هتختار تعيش لإيه ؟!

و وانا بحط المفتاح في الباب و بفتحه .. لقيتني بقول تاني ..

المسني .. ونسني .. انا حيران !

* على الهامش .. نفسي في مطر .. ريحته وحشتني ..

Advertisements

2 Responses to “شبورة ..”

  1. وشوشات Says:

    صحيت الصبح.. قريت البوست ده.. حسيت نفس إحساسك و اتمنيت نفس أمنيتك.. بقالي فعلا كذا يوم باقول للعيال في الشغل نفسي أشم ريحة الهوا بعد المطر.. الساعة كانت 8 صباحا.. بصيت من ورا إزاز البلكونة لقيت الدنيا مغيمة.. قلت شكلها كده هاتمطر.. بافتح الإزاز لقيت ريحة الجو زي ما اتمنيتها بالظبط.. بابص في الشارع لقيت الدنيا ممطرة.. فتحت رئتي ع الآآآآآآآآآخر و شميت هوا الدنيا و لسه يادوب المطرة مبطلة.. قلت تلاقي حسن دلوقتي نايم :)

    إحلم انت بس و اتمنى يا حسن :D

  2. Cinderella Says:

    بصراحة اولا لابد ان اعلن هيييييييييييييييييييييييييه عجبك فيلم للفامبيرز :P

    تاني حاجة ..نفسي جداااااااااااااا في مطر
    ونفسي اكتر في شبورة وابقي لوحدي الصبح في النادي ..الصبح اوي بتاع 6 كده :)

    ثالث حاجة
    انا بحب اني اعتقد
    nothing is opposed on me
    مش في الفكرة العامة
    لا في المشاعر والقرارات

    بس كده :)


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: