April 5, 2010

اعتقد انه من الغريب ان الواحد يبدأ كتابة بكلمة “مش عارف هاكتب ايه” .. لأنك لو مش عارف اكيد مفيش حد يهمه انه يعرف ده اولا .. و ثانيا انك مش مجبر عالكتابة و بالتالي مش مطالب انك تكتب و انت مش عارف معندكش حاجة تكتبها ..

مع ذلك .. انا حاسس اني عايز اكتب و فعلا مش عارف اكتب ايه..

احساسي اني مش عارف انا هاكتب ايه كتير بيمنعني من الكتابة .. و ده اظنه راجع لسبب عندي متأصل – للأسف او لا- عندي و هو الرغبة في معرفة انا رايح فين و احساسي ان انا المتحكم الوحيد في مسار كل حاجة تخصني .. يمكن ساعات حتى لو دي مش الحقيقة بحاول اقنع نفسي بكدة علشان اقدر اتوائم مع الحدث ..

انا عندي فوبيا .. او مش فوبيا .. يمكن ماوصلتش لدرجة الفوبيا بس قلق من موضوع معين كل ماجي افكر فيه .. موضوع مرتبط بنفس الكلمتين اللي فوق ..

قلق من الدخول في اي عملية جراحية صغيرة كانت او كبيرة .. علشان مرحلة الافاقة من التخدير و ما يحدث فيها من فقدانك للسيطرة الكاملة على عقلك !

الموضوع ده “الرغبة في السيطرة على عقلك” من اكثر العمليات ارهاقا .. و ساعات كمان يمكن غباء !

هو اكيد بيفيد ساعات -كتير- بس في بعض الاحيان بيبقى نفسك تفضي دماغك من كل حاجة .. من كل تفكيرك في العواقب من اي احساس بمسؤولية تجاه نفسك او اي حد حواليك و تعمل بس اللي انت حاسس بيه في اللحظة دي !

يمكن الموضوع ده من اهم الأسباب اللي خلتني مجربتش اي حاجة تغيًب العقل ..

انا بطبيعتي شخص مزاجي جدا .. استمتاعي بالأشياء من عدمه ينبع معظم الاوقات من احساسي الداخلي .. من رغبتي في الاستمتاع او عدم وجودها .. اكتر بكتير من العامل الخارجي ..

السجاير فعلا بنت ستين في سبعين .. و انا دايما بوصف نفسي بإني مدخن مزاجي .. يعني انا ممكن افضل شهرين مشربش سيجارة و في يوم واحد ممكن اشرب علبتين !

السجاير بالنسبالي حالة خاصة .. وقت بتعمل فيه حاجة انت متأكد انها غلط مش لأي سبب تاني غير ان انت عايز تعمل كدة ..

انا لا اؤمن بالمرة بموضوع ادمان السجاير ده – او على الأقل بالنسبالي .. اكيد الموضوع بيختلف من شخص لآخر- بس حتى تفكيري في السجاير كإدمان ممكن يعمل حاجة واحدة بس .. يبعدني عنها نهائي

و ده اللي حصل زمان لما حسيت اني بشرب كتير .. بطلت خالص لمدة سنة و شوية و بعديها رجعت اشرب لما بس يجيلي مزاج !

النهاردة مثلا جبت علبة و انا في الشغل .. رميتها و هي فيها اكتر من نصها و انا طالع على طريق السفر -على غير عادتي انا استمتع بالسجاير في الطريق مع مزيكا ممتعة- !

و ياما عملت كدة .. اجيب علبة اشرب منها سيجارة الساعة تلاتة الصبح على كوبري قصر النيل و انا بتمشى بعد ما اركن العربية .. و بعد ماركب العربية تاني .. ارمي العلبة في الشارع علشان احس اني مش عايز اشرب تاني !

الموضوع ده على قد ما ممكن يبقى ميزة .. ممكن يبقى عيب قوي و عبء نفسي على الانسان لإنك في الاخر و مع ادراكك لحجمك الحقيقي في وسط اللي بيحصل حواليك و يقينك انك ماتملكش كل ورق اللعبة .. بتحاول تفضل مسيطر على اللعبة .. بالزبط زي دور استميشن انت واخد فيه داش كول من قبل ماتشوف ورقك طبعا .. و تفتح الورق تلاقي معاك من كل الألوان و معاك ورقتين تلاتة عاليين .. و تفضل على بتحسب و على اعصابك لحد مالدور يعدي ! و لو حسبت حسبة واحدة غلط .. او حتى واحد بيلعب معاك حسب غلط .. انت برضو بتخسرمعاه !

انا مش بحاول اوصل لأي نقطة منكتابة البوست ده .. انا كنت بس عايز اكتب و كتبت منغير ماعرف هاكتب ايه و لا حتى هحاول اراجع اللي كتبته ..

P.S.  لو في حدي يعرف ازاي لما اكتب انجليزي في وسط الجملة الكلام اللي بعده مايتعكسش ياريت يقولي

P.P.S.  انا غالبا هعرفها لوحدي بس بصراحة مكسل افكر في اي حاجة فلو ماحدش عارف ياريت ماحدش يدور

Advertisements

3 Responses to “”

  1. washwashat Says:

    و انا استمتعت بالبوست ده جددددددددددددددا :)

    أحبك كده و انت مش عارف تكتب ايه :D

  2. shadows Says:

    Sometimes by losing a battle you find a new way to win the war.
    Loss is not necessarily something we should always avoid.
    Somtimes its better if we just surrender to the fact that letting go might just be the right thing to do.
    The fear of losing is what makes competitors so great:)


  3. اولا احيك جداا انا بتشرك بشخبطه كده انا سعات بعمل زيك بس بكتب علي ورق وبرميه وسعات بكتب في فيل وبرميه لاكن قرارت اطلع من الحله ديه واكتب وابتديت فعلا امبارح بس :) واتمني ميكونش سحبه وعديت
    ثانيا احيك جدا في موضوع السجائر انا مش مدخن لاكن خالي مدخن زيك تماما او انت زيه لانه هو 59 سنه جميل هو زيك كده اردته قويه هو البيتحكم مش اي حد يتحكم في حياته حتي لو كانت سجايره لعينه برافو عليك ده اول بوست اقراءه هاغتل المدونه بعد البوست وهاكمل اتمني لك التوفيق ياعزيزي


Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: